fb

Q18aad Sir Dahsoon Iyo Sadaxeeye Jaceyl “Sheeko Aad Iyo Aad U Xiiso Badan”

Published: January 10, 2013, 12:00 am

Waa sheekadii xiisaha badneyd ee sir dahsoon iyo sadaxeeye jaceyl qeybteedii 18aad………

Waxaannu qansaxle uga baxney dhanka koonfureed, dul iyo dhagax adag baannu sii marney, jillab iyo dhir kale baa lugaha kaa xaganaya, saacad markaannu soconney ayaannu ku soo baxney jees meel daggan, cumar baa waraystay oo waydiiyey halka reerkaan ku soconnaa dagganyihiin, iyaguna wayba noo farmuuqeen oo waa aqal soomaligaa halkaa ka dhisan baynagu yidhaahdeen.

Cabsi baa I gashey aniga waliba mid saa’ida, wadnihii baa I boodboodey, waxaannu ku sii soconnaa gurigii naloo tilmaamey. Intaanan gurigii gaarin baannu dhanka galbeed ka maqalnay xamxam iyo hadal hoose oo u ekaa mid dumar. Waannu ku leexannay mase waxaaba fadhiya geed halkan ah ayaan iyo gabar kale oo iska sheekaysanayey cawskii geedka ka baxayna ku dul fadhiyey oo dooggii indhaha ku qaboojinaya.

Hal mar ayaa dhidid iga soo boodey sida nin maantoo dhan ordayay, wadnuhuna garaacii badiyey,  sidaa ay hablihii noo soo jeedaaliyeenba waxaa isku dhacey indhaygii iyo kuwii ayaan, hal mar baan ka dareemay inaysan mahadin aragayga hoosna iiga jeesatay, waan farxay markaan arkay araggeeda oo runtii waxaa ku ildoogsadey indhaha, waxay aheyd qof aan qalbigayga ka tiri waayey kuna qorneyd meel aad iyo aad u fog. Anigu maba hadline cumar baa bariidiyey, gabadhii kale baa bariidadii ka qaaddey, ayaan waxay eegaysaa hoos. Ma rabto inay isoo fiiriso. Waxayba nacaysaa araggayga oo Allow yaa kaa hor dhaqaajiyay taagan tahay.

Intaan raganimo iska dayey baan hablihii wada salaamey oo idhi “ayaan dhulka maxaa kaaga lumey” iimaysan jawaabin.  Cumar oo durbadiiba dareemay ayaantu tay tahay ayaa gabadhii kale la hadlay oo ku yidhi walaal waxbaan rabey inaan ku yara waydiiyo ee mayna soo kicin kartaa. Iyaduna haa fudud bay inta ku tidhi horey ka kacdey oo dhankaa ula dhaqaaqdey cumar.

Waan ku farxay indheer garadnimadiisa  iyo inuu kasho I siiyay aan kula hadlo tan qaaddey qalbiga. Waan fariistay waxaana na dhex maray hadalladaan:

Aniga: gacaliso ayaan ma fiicantahay kawaran caafimaadka?

Ayaan: ereygaa mar danbe hadaad I dhahdid waan kaaga kacayaa meesha, araggaaga ayaan dhibsanayaa wiilyohow wixii aan wanaag kuu galana adigaa burburiyey ee maxaa ku keenay meeshan ood iiga daba ordaysaa ma inaanan ku ogeyn baad I moodaysaa? iyaa?

Aniga:

Dibcadii haweenkaay

Adaan dumarka oo idil

Inta dunida joogtoo

Afrikiyo oroobba leh

Alla kaa ishaartaye

Inaan daacad kuu ahey

Dadka kuugu jecelahay

Adna dabinno wayniyo

Igu habayso dacar kulul

Daw miyaa ayaaney?

Damiirkaagi gabadhnimo

Ruuxee la dolondoley?

Yaa diley kal gacalkii?

Bal u fiirso derejada

Maxaa duurkan qalaxaa

Duddadaan I keenoon

Kuu daba ordaayaa?

Danqashiyo il naxariis

Igu daawo gabadhyahay

Duruuftiyo dhibkaan iyo

Daaduunka aan qabo

Waa adi daraaddaa

Waxa aan la diifee

I dareen ayaaney!

Ayaan: ama hees ama geeraar tiri wax ku anfaca aan kuu sheego barkhadoow, mar danbe agtayda yaanan kugu arag haddii kale waawareey baan oranayaa, iddaa fadlan ammaan isii kuma jecli, haddaan shalay ku jeclaa maanta ku nacay. Ma doqon baad tahay maxaad ii daba ordaysaa sownigan ku leh ku nacay! Kuma rabo waad ogtahay sababtaan kuu nacey adaa iskey nacsiiyey ma doonayo inaan kuu calaalo war iyo dhammaantiis nabadeey hana isoo raacin haddaad Ilaahey taqaanid!

Ma xasuusto goor ay kacday, waxaan ka war helay anigoo kaligay oynaya oo  ilmaynaya sia xowli ah, inaan is dilo baa ila fiicnaatay! Maxaan galabsaday akhriye?….

Waxaa arkay cumar halkay howshu marayso, wuxuu ka daba orday ayaan, oo uu la hadlay iskuna dayey inay maskaxda ii dajiso, way ka diidey waliba si adag kuna tidhi adiga ayaa keenaye dee meeshad ka keentay gee aniga waxba iskuma nihin kaase  Allahaa Alle haduu yahay iska key daa isaguna ha iska key daayo.

Cumar wuxuu iisoo laabtey isagoo quus ah, anigoo meeshii la I saraa aysan dhiig lahayn, naxdin baan la jiifsadey geedkii ay iiga dhaqaaday hoostiisii, hurdana magaline inta dhabarka u jiifsaday cirka u jeediyey indhihii, waxaan ku dhaygagay daruuraha, aad iyo aad baan u fikiray wuxuuna fikrikaygu isku shareeray samada. Cumar markuu ila soo istaagey buu wuxuu yiri barkhadoow waa adduun! Ee inaga kici meesha saaxiib.

Markaasaan xaqiiqdsaday inay isagana waxkasta ka diiddey markaasaan idhi anoo si u dawakhsan:……………..

Lasoco qeybaha danbe ee sheekada oo aad u xiiso badan

Qoraaga Sheekada Abwaan Hassan Haashi “Timacade”

Sheekadaan waxeey xuquuqdeeda gaar u tahay kobciyemedia.com

hassanhashi2010@hotmail.com


HADAAD ISTICMAASHO FACEBOOK HALKAAN KU REEB FIKIRKAAGA

Comments are closed.